പ്രതീക്ഷ

ഒരു മാല കോര്‍ത്തു നാം ഭാരതത്തിന്‍‍,

കമനീയ കണ്‍ഠത്തിനാഭയേറ്റാന്‍

അതിലെ സൂനങ്ങളായ്‌ പലജാതി, പലമത,

വിവിധഭാഷക്കാരാം ഭാരതീയര്‍.

ഇവിടെ ശ്രീബുദ്ധനും ശങ്കരാചാര്യരും

തൊഴുകയ്യോടമ്മതന്‍  മുന്‍പില്‍ നിന്നു

ശാന്തിമന്ത്രങ്ങളാല്‍‍, വേദാന്തജ്യോതിസ്സാല്‍

മാതാവിന്‍‍ പദതാരില്‍‍ പൂജചെയ്തു

പരദേശഭരണത്തില്‍‍ ക്ഷമകെട്ടു തനയര്‍ നാം,

ഒരുമയോടെത്തിയടര്‍ക്കളത്തില്‍

അതുവരെ കേള്‍ക്കാത്ത സമരായുധങ്ങളാ-

ലവരുടെ ഭരണം തുടച്ചുമാറ്റി.

അതുകണ്ടു സഫലയായമ്മയെ നാം പക്ഷെ

ചുടുചോരയില്‍ മുക്കി കൃതഹസ്തരായ്‌.

             (2)

ഇവിടെ വേതാളങ്ങളാര്‍ക്കുന്നു, ഭൂമിയി-

ന്നൊരു കുരുക്ഷേത്രമൈതാനമായി

കുടല്‍‍മാല ചാടിച്ചു, രണനീരില്‍‍ പുളയുന്ന

ചുടലഭൂതങ്ങളഴിഞ്ഞാടുന്നു.

രുധിരപാനത്തിനായ്‌ കരവാളുയര്‍ത്തുന്നു

കൊടികുത്തി വാഴുന്നു കാപാലികര്‍‍

അഴിമതി, യക്രമം വഞ്ചനയെന്നിവ-

യിവിടെ മദിച്ചു കൂത്താടിടുന്നു.

അലമുറയുയരുന്നു, സ്വരരാഗധാരക-

ളവയില്‍ ലയിച്ചു മറഞ്ഞിടുന്നു.

കടലുകളലറുന്നു, തീരത്തു മുടിയഴി-

ച്ചിളകിയാടുന്നു കരിമ്പനകള്‍

ഇതിനിടെ പ്രകൃതിതന്‍‍ പച്ചപ്പുതപ്പുരി-

ഞ്ഞതിമോഹമമ്മാനമാടിടുന്നു.

വിറകൊണ്ടുതാഴേക്കു നോക്കുന്ന താരകള്‍‍

പുകയുന്നു, ചുടുകണ്ണീര്‍ വീഴ്ത്തിടുന്നു.

പുതിയൊരു ശതകത്തി,ന്നുദയത്തി,ലിവരിന്നു

ക്ഷമയെ ശവപ്പറമ്പാക്കിടുന്നു

വ്രണിതയാം മാതാവിന്‍ തിരുമാറില്‍ തിരുകാനാ-

യൊരു പുഷ്പചക്രം ചമച്ചിടുന്നു. 

          (3)

ഇതിനൊരു പരിഹാരമില്ലേയെന്നഴലാര്‍‍ന്നു

ഗതികെട്ട മാനവര്‍ കേണിടുന്നു. 

നിഴലില്‍‍ നിലാവിന്‍റെ കണികയേത്തേടുന്നു

കദനത്തില്‍‍ കനിവിന്‍റെയലതേടുന്നു.

ഇടയന്‍റെ  വേണുഗാനത്തിന്നു ചെവിയോര്‍‍ക്കു-

മജജാലം പോലവര്‍  കാത്തിരിപ്പൂ

ധൃതരാഷ്ട്രാലിംഗനത്തില്‍ നിന്ന് മോചനം

നെടുവീര്‍പ്പിലുലയുന്നു ശോകധാര

വെറുതെയാകില്ലയെന്‍ സഹചരേ കാത്തിരി-

പ്പൊരുനാളീ രണഭൂവിന്‍ കാമുകന്മാര്‍‍

നവകുരുക്ഷേത്രത്തില്‍ നിപതിക്കും നിശ്ചയം

അവിടെനിന്നുയരും തളിര്‍‍നാമ്പുകള്‍.‍

     &&&&&&&&&&&&

                       കൃഷ്ണ